مصر دي موززة آخر 25 حاجة - نعم للتعديلات الدستورية

انا عايز أقول في الأول ان مصر دي موززة آخر 25 حاجة

الله الله عالمستقبل باين في عيون كل ولادنا............... بجهودنا يا ناس هايكون اكتر و الخير هايعم على بلادنا

تحيا مصر تحيا مصر تحيا مصر

الشعب كله بيناقش الدستور و يبدي رأيه و المثقفين شغالين الله ينور على الفضائيات و الجرائد و الانترنت بيطرحوا وجهة نظرهم

ايه الحلاوة دي ايه الطعامة دي ايه البلد الجامدة موت دي بحبك بحبك بحبك يا مصر

بخصوص التعديلات

في ناس خايفة و عندها قلق عظيم و الحقيقة هذا القلقل له مبرراته

انا طبعا هاصوت بنعم لييييييييييييه؟؟؟؟؟؟؟

اولا لو الناس خايفة من انه يجي رئيس بصلاحيات كتيرة خلال الفترة الإنتقالية و يخرب الدنيا و يؤثر على المجلس و اللجنة التأسيسية اللى هاتعمل الدستور طيب ماهو نفس التخوف مع مجلس رئاسي يعني ايه الله يضمن لينا ؟؟؟؟؟؟؟؟! يبقي رئيس منتخب أحسن من مجلس رئاسي معين. و بعدين مين اللى هايعنه ما هو الجيش برده و كمان هيكون في واحد من الجيش في هذا المجلس يعني هاتكون القوة معاه و هايفرض رأيه يعني من الآخر بندور في حلقة مفرغة

ثانيا احنا عايزين الجيش يفضل قاعد ولا يمشي يروح يشوف شغله لازم الجيش يرجع لدوره و الدولة تقوم بدورها

ثالثا انا مطمن جدا في ظل وجود حكومة د/ عصام شرف و شايف انها هاتعبر المرحلة بنجاح و مش هاتقبل اي مساومات من الرئيس المنتخب لو حب يعني يلعب بديله شوية

رابعا ثقتي في الشعب العظيم و مولانا ميدان التحرير كبيرة جدا انهم يوقفوا امام اي واحد عايز يهيس حتي لو كان الرئيس المنتخب

خامسا الناس اللي خايفة من الإخوان و فلول الحزب الوطني بقولهم الإخوان هاينزلوا على 30% فقط من المقاعد و فلول الحزب انا اشك انها تحقق نجاح بدون تزوير و الشعب دلوقتي واعي و صاحي و مفنجل عينيه على الآخر

سادسا المجلس العسكري قرر انه هايفتح حرية تكوين الأحزاب بعد الإستفتاء يبقى رجالة الثورة يشدوا حيلهم و يشتغلوا من دلوقتي على برامج الأحزاب اللى هايكونوها و ينزلوا للناس و الناس جاهزة جدا لإستقبالهم و التفاعل معاهم لان الثورة اختزلت الزمان و المكان وده لازم يستغلوه بسرعة قبل الناس ما تهدي و تنسى

نعم للتعديلات الدستورية

بحبك يا مصر بحبك يا مصر بحبك يا مصر

آفة الثائر من البشر

آفة الثائر من البشر ان الثائر يظل ثائرا

ولكن الثائر الحق هو الذي يثور ليهدم الفساد ثم يهدأ ليبني الأمجاد

ولا يضع الذين طغي عليهم على رجله و يرفس الظالمين و لكن يجعل الاثنين سواء و يأخذ من الظالم ليعطي المظلوم

الله يرحمك يا شيخ شعراوي

آفة الثائر من البشر

http://www.youtube.com/watch?v=GpS9hzsseVc

آفة الثائر من البشر ان الثائر يظل ثائرا

ولكن الثائر الحق هو الذي يثور ليهدم الفساد ثم يهدأ ليبني الأمجاد

ولا يضع الذين طغي عليهم على رجله و يرفس الظالمين و لكن يجعل الاثنين سواء و يأخذ من الظالم ليعطي المظلوم

الله يرحمك يا شيخ شعراوي

هذا الوقت هو وقت الشباب ووقت الحرية و الديموقراطية داخل الإخوان

مطلوب من كل المكاتب الإدارية التقدم باستقالتها فورا و اجراء انتخابات حرة نزيهة علنية

مطلوب ان يكون حزب الحرية و العدالة ليس ذراعا من اذرعة الإخوان

مطلوب اجراء انتخابات لإختيار المرشد يشارك فيها كل الأفراد العاملين

مطلوب ان يشارك كل الأفراد العاملين في اختيار المكاتب الإدارية و مكتب الإرشاد

لابد من اتاحة الفرصة للمعارضين قولا وفعلا

لابد من تواصل مباشر بين كل القطاعات داخل الإخوان

لابد من فصل العمل السياسي عن العمل الخيري و الدعوي

لا نخوف الناس بفزاعة الدين و شق الصف و الخروج عن راي الأغلبية

لو عايزين ندخل في النسيج الوطني بجد لازم نكون واضحين و في مشاركة حقيقية من جموع الشباب في اختيار القيادات ووضع السياسات و ادارة الأمور وان ننفتح على الآخر

أرجوا ان يكون هناك من يسمع

الإخوان شريحة طولية من الشعب و ليست عرضية يعني من الوزير الى الغفير

تغيير الإخوان من الداخل من حيث السياسات و الممارسات سوف يكون اضافة عظيمة للمجتمع المصري

نعم لثورة ضد تطوير و تغيير المفاهيم و السياسات داخل الإخوان مع جزيل الإحترام و العرفان لكل القيادات القديمة

هذا الوقت هو وقت الشباب ووقت الحرية و الديموقراطية داخل الإخوان

مصر محتاجة مدير تسويق شاطر

مصر محتاجة مدير تسويق شاطر

ده العنوان الكبير و طبعا التطبيق مش لازم يكون حرفيا يعني مش مدير تسويق كشخص واحد, ممكن يكون في شكل هيئة او وزارة للتسويق.

و التصور المبدئي كالآتي:

* الأهداف من تكوين ادارة التسويق دي :

1- هو تحسين الصورة الذهنية لمصر في الخارج و الداخل

2- زيادة الناتج القومي

3- المنافسة العالمية ووضع مصر في مصاف الدول المتقدمة

4-استغلال و توظيف طاقة الإبداع العظيمة الموجودة عند الشعب المصري العظيم

* الشكل التنظيمي

1- تكون هيئة برئاسة احد خبراء التسويق و تضم مجموعة من خبراء التسويق و الشباب المتمرس في هذا المجال و تكون ممثلة في اجتماعات مجلس الوزراء

2- تبعية اللجنة الى رئيس مجلس الوزراء

3- موارد اللجنة تكون من ميزانيات الوزارات المختلفة و الرعاة و غيرها من وسائل الحصول على تمويل مباشر و غير مباشر

ممكن تكون البداية باننا نبدا نخطط للسياحة في الموسم القادم من الآن لجذب السياح من كل دول العالم

الموضوع فيه تفاصيل كتير و ممكن نعمل ورقة عمل و نقدمها لمجلس الوزراء و ده اللى هاحاول اشتغل عليه ان شاء الله

تحيا مصر

شدوا الهمه يا رجالة الإخوان

أنا عارف ان البوست ده هايفتح عليا ابوب صعبة كتير و يمكن ناس تقاطعني بسببه, بس انا برده هاكتبه

نقول و بالله التوفيق....

مش احنا بالصلاة على النبي عملنا ثورة و لأ مش أي ثورة دي ثورة بجد

و احنا كمان عايزين الثورة تيجى على كل حاجة و تغيرها للاحسن..... حلو الكلام

طيب هي جماعة الإخوان من الداخل مش تبع التغيير ده ولا ايه؟ ده حتى هما كان ليهم دور جامد آخر 25 حاجة في الثورة بشهادة الجميع

النظام الداخلي للإخوان يشبه كثيرا نظام العهد البائد في مصر مع الاختلاف في المنطلقات يعني الإخوان بينطلقوا من الدين و دي داهية سودا

قبل ما حد يفهمني غلط انا هاقول ليه داهية سودا ببساطة و بالبلدي

ببساطة لان كل حاجة بتقولها الجماعة هي لصالح الدين و الدين بتاع ربنا وانت من جند ربنا و لو ماعملتش يبقى انت مش بتنصر الدين بتاع ربنا و لو ما نصرتش الدين بتاع ربنا و ما سمعتش الكلام تبقى انت آثم يعني ذنوب و كمان انشقاق عن الصف يعني خسارة لهذه الضمانة الإجتماعية و المادية و الأدبية اللى اسمها الإخوان المسلمين

طيب بالذمة و الدين ده ينفع يا ناس

ينفع يبقى نفس الناس المحترمة الكبيرة في السن اللى هما من ايام حسن البنا و منهم اللى عاصر كل الانظمة من قبل ثورة يوليو حتى ثورة يناير هما اللى بيحكموا

ينفع يبقى اللى يعارض بالفعل ينطرد و يتحط عليه دايره حمرا

ينفع وكيل المؤسسين للحزب الجديد يبقى الكتاتني مش واحد من الشباب

ينفع الأفراد يكونا بيلتزموا بكل حاجة حتى لو حصل النقيضين في وقت قريب زي دخول الإنتخابات و مقاطعتها

احنا عايزين (ولا بلاش احنا دي , انا عايز علشان ما حدش يقول انت بتتكلم عن مين انا بتكلم عن نفسي) تغيير و حياة ديموقراطية جوا الإخوان و عايزين نشيل الناس القديمة الطيبة و نجيب شباب يقود الفترة اللى جاية

يلا يا رجالة مصر مستنية لانكم مش شوية و قوة مؤثرة جدا و استحملتوا كتير علشانها

تحيا مصر

تحليل لاداء الجيش المصري منذ استلام ادارة البلاد 12 فبراير و حتى الان

قلقي و خوفي الممزوج بالتفاؤل و الأمل بالإضافة الى قرآتي مقولة للبرادعي يقول فيها (عدالة بطيئة هي عدالة غائبة) و مقال لمحمد دياب يقول في مضمونه (ان الجيش و الشعب يلعبون لعبة المستهبلة سويا) يجعلني أذكر نفسي ببعض الأمور:

أولا ماذا تحقق منذ تولي الجيش مهام ادارة البلاد و نسبة النجاح في كل عمل على حدا في وجهة نظري

1- توقيف العمل بالدستور 100%

2- حل مجلسي الشعب و الشورة 100%

3- اجراء تعديلين في الحكومة بما فيهما من

· تعيين يحيي الجمل نائب رئيس الوزراء لشئون الحوار المجتمعى 100%

· تعيين وجوه جيدة مثل: 100%
الدكتور عمرو عزت سلامة- وزيراً للبحث العلمى والتكنولوجيا
الدكتور سمير الصياد – وزيراً للتجارة والصناعة
الدكتور أحمد جمال الدين موسى – وزيراً للتعليم العالى والتربية والتعليم
الدكتور ماجد عثمان – وزيراً للاتصالات
الدكتور جودة عبد الخالق – وزيراً للتضامن والعدالة الاجتماعية
منير فخرى عبد النور- وزيراً للسياحة
المهندس محمد عبد المنعم الصاوى – وزيراً للثقافة
الدكتور أشرف محمود إبراهيم حاتم – وزيراً للصحة والسكان

4- التحقيق في قضايا الفساد مع كثير من رجالات النظام السابق مثل عز & العادلي & جرانة & المغربي & الفقي & الشيخ ............................. و مازالت الملفات يتم فتحها و بعضهم تم تحويله الى الجنايات 100%

5- تشكيل لجنة لتعديل الدستور برئاسة المستشار البشري و قد انتهت اللجنة و سيتم طرح التعديلات للاستفتاء و فيها بند يلزم الرئيس بتغيير الدستور خلال ستة أشهر من انتخابه 100%

6- سوف تكون الانتخابات بالرقم القومي 100%

7- التحفظ على أموال الرئيس السابق و عائلته و طلب تجميد الأرصدة في الخارج 100%

8- انشاء صفحة على الفيس بوك للتواصل مع الشباب و تقريبا يوميا هناك بيان ان لم يكن اكثر 100%

9- اتاحة الفرصة للتواصل المباشر مع كل قنوات الإعلام بدون شروط 100%

10- حماية المتظاهرين و مساعدتهم في ميدان التحرير و حين حدث خطأ من بعض افراد الشرطة العسكرية تم الاعتذار في مؤتمر رسمي علني 100%

11- قبول اي فكرة مختلفة و الوعد بطرحها للنقاش و التلميح دائما بان المسئلة مسئلة وقت لإنجاز باقي أهداف الثورة و أن الموضوع يحتاج وقت وأن الجيش لا يرغب في الا حتفاظ بالسطة و هذا كان هاجس لكل الشعب 100%

ثانيا هناك بعض نقاط الخلاف و تقيمي لأداء الجيش فيها في ضوء الوقت و التحديات و منها:

1- تعديل الدستور و عدم وضع دستور جديد من البداية 100%

2- الانتخابات التشريعية أولا قبل الرئاسية 100%

3- عدم الغاء حالة الطوارئ الا بعد استقرار الوضع الأمني 100%

4- عدم حل جهاز أمن الدولة فورا الا بعد استقرار الوضع الأمني والابقاء عليه مع تغيير توجهاته و اختصاصاته 75%

5- الابقاء على أحمد و مرعي و وجدي وابو الغيط واسماعيل فهمي 50%

6- التأني في جمع الادلة التي تدين العادلي على دم الشهداء 100%

7- عدم حل الحزب الوطني و اعادة كل اصوله للدولة فورا 100%

8- تأجيل محاكمة حسني مبارك و اسرته 100%

9- التأني في جمع الادلة التي تدين باقي رموز الفساد مثل سرور و صفوت فورا 100%

ثالثا هنا يجدر الاشارة الى بعض الأمور:

1- تفهم النفسية العسكرية و التي تحب أن تاخذ كل خطوة و قرار بتأني و هدوء.

2- نفسية المؤسسة العسكرية لا تحب أن يضغط عليها أحد خاصة وان كان الشعب الذي تري المؤسسة العسكرية انها وقفت الى جانبه و انقذته في وقت حرج

3- لابد أن يكون هناك نسبة إختلاف تقدر في وجهة نظري من 5 الى 10 % عن اراء الغير حتى لا يشعر الجيش بانه مسير و ليس مخير

4- أكيد الجيش يتعرض لضغوط و املاءات أخري من الخارج و اري انه حتى الان يجيد استخدام فن التوازنات

رابعا اقتراحات:

1- تشكيل لجنة حوار و طني من الجيش برئاسة يحي الجمل و عضوية 25 من رموز الفكر و تكون في حالة انعقاد مستمر

2- عمل جمعة لتكريم الجيش قريبا جدا و لتكن القادمة

3- طلب جدول زمني من المؤسسة العسكرية لتنفيذ المطالب المؤجلة التي اكدوا انهم يدرسونها

4- وقف الاعتصام في ميدان التحرير لإعطاء فرصة للجيش لتحقيق المطالب في ضوء الجدول الزمني الذي يتم تحديده مع الجيش