انا بتكلم عن شخصيه فيها من الغرابه زى اللى عند الأم بمعنى : ان الام شخصيه ربنا خلقها تعطى بدون انتظار المقابل و لما تزعل منك برده بتخلى بالها منك و تلاقيها اول واحده و اقفه جنبك مش دى برده حاجه غريبه؟؟؟؟
- الشخصيه دى غيرت مسار حياتى منذ البدايه يعنى و انا عندى 21 سنه لماكنت عايز اخطب و احده و كنت عايش قصة حب بقى وكده و هوكان مصمم على ان ارفض الموضوع و بعد مواجهات معاه سمعت كلامه و بعدها بشهر بس عرفت انى كنت هاخد مقلب محترم.
- الشخص ده لما بيبقى عنده مشكله بيتخطاها فى صمت و هدوء يعنى هو اتجوز و بنى نفسه بنفسه بدون ما حد يحس انه محتاج حاجه .
- الشخص ده عنده مقدره غريبه على انه يعمل حواليك جو من الاهتمام بدون ما تعرف . يعنى يكلم ناس كتير من علاقاته و اصدقائه و هم كتير علشان يكونوا معاك لما انت تكون محتاج مساعده . اذكر هنا مواقف مثل و جود المهندس احمد حسان فى عملية امى الاخيره فى مستشفى الفاروق ووجود عماد الصادق لما كنا بننقل السكن لبابا و ماما و اسماء من المطريه للجيزه و قبلهم الدكتور اسامه حجى فى علاج امى من الروماتويد
- الشخص ده له فلسفات خاصه جدا فى حياته جعلته ناجحا جدا فى حياته العامه و الاجتماعيه و فى مره من المرات كتب لى روشته لما كنت باعانى نفسيا من بعض المشاكل و الروشته هى
1- خلى بينك و بين ربنا حاجه بتعملها و تواظب عليها ما حدش يعرفها غيرك انت و ربنا
2- راعى ابوك و امك ما حدش عارف مين هايعيش لأمتى
3- الدعاء
- الشخص ده هو الوحيد اللى شوفت فيه معنى كنت باسمع عنه فى السيره عن النبى صلى الله عليه و سلم انه يعطى عطاء من لا يخشى الفقر . فهذا الشخص ينفق انفاق الملوك الكرام و كأنه منهم و ايضا وكأنه لا يعرف الارقام.
ساعدنى كثيرا بما كان يفوق توقعاتى و كمان لازم يعمل جو جميل و هو بيساعدك
- الشخص ده حساس بشكل غريب بالرغم انك تحس انه قوى و متماسك فى مره من المرات الكتير اللى كنت مريض فيها و اخدنى ودانى مستشفى الامل بتاعت الدكتور عبد القادر حجازى و نمت على رجله فى التاكسى و دموعه بتنزل على وجهى لا انسى هذا الموقف ابدا
و موقف اخر لما كنت فى ازمه عند اخوانا البوعداه ولما وصلنا مكان العرض لم اراه فقعدت انادى بأعلى صوتى على امى هو .....فين هو........فين كنت خايبف يكون تعرض لما تعرضت له و لكن بعد كده عرفت انه كان موجود بس مش قادر يشوفنى و انا فى الموقف ده و طبعا كان بيبكى .
- الشخص ده بيهتم بأبوه وامه فى ادق التفاصيل السكن العلاج الآكل الملبس
- الشخص ده بيحب شغله و مجتهد بشكل رائع و انا تعلمت منه ذلك
- الشخص ده عنده القدره على التعامل مع كل اصناف الناس خاصة الناس البسيطه و يكسب حبهم بمنتهى السهوله (ينقصه فقط ان يكون من مواليد برج الميزان)
اكتفى بهذا القدر و له فى قلبى اكثر من ذلك بكثير اسئل الله ان يحفظه فهو ثروه لى و خير للمسلمين
هذه الشخصيه هى أخى محمد البنا (ابويا و ابنى)