لو ما كنتش بني آدم, كنت تحب تبقى ايه؟

انا لو ماكنتش بني آدم كنت احب أبقى ماء (السائل الذي نشربه وليس صوت الخروف
لأن الماء :
- صافي
- شفاف
- ليس لديه أجنده خاصه فهو يتأقلم مع أي مكان و في أي مساحه يوضع فيها
- يعكس صورة الاشياء بدون تزييف
- متواضع ينساب من أعلى الى اسفل ولا يمكن العكس الا بفعل فاعل او اداة
قوي جدا و قوته تكمن في هدؤه لكن اذا ثار يحطم كل ما حوله ولا شىء يقف امامه-

ممكن للأشياء الاخرى ان تحتويه ومن الممكن ان يحتوي هو الاشياء-

مانويل جوزيه

مانويل جوزيه

التدوينه دي مش علشان أنا اهلاوي حتي النخاع, ابسلولتلي, التدوينه دي من فرط أعجابي ب مانويل جوزيه

مانويل جوزيه مدرب النادي الأهلي المصري أعتبره من الشخصيات التي يجب أن أتعلم منها الكثير لأني شايفه قائد محنك وكمان عنده القدرة على ضبط مشاعره تجاه الفريق و الاحداث ( مش بيلغي مشاعره, بس بيضبطها) كمان احساسه بالنصر مختلف عن المدربين اللي الواحد بيشوفهم, أنا بشوفه بيحس بالنصر على انه حاجه كان منتظرها و طبيعي انها كانت تيجي, هو مش بيجامل حد اذا كان هذا الحد ما يستاهلش المجامله, و في نفس الوقت بيهتم بالناس اللي المفروض يستحقوا الاهتمام زي ما بيعمل مع أبو تريكة, عنده بعد نظر( بضم الباء) زي ما عمل مع فلافيو, تصريحاته متزنه جدا و بينسب الفوز للجميع مش لنفسه بس, بيخرج عن مشاعره في بعض المواقف و ده دليل انه بيحب شغله و مش بيمثل الهدوء, عمل اعمال خير زي ما سمعنا انه اتبرع لمستشفى السرطان, انا شوفته بيبكي وهو يتحدث عن الراحل محمد عبد الوهاب لاعب النادي الأهلي في الذكرى السنويه له في برنامج على قناة الأهلي.
يمكن أنا لفت نظري الصفات دي لانها صفات اتمني انها تكون عندي وانا بشتغل ( انا برده عندي فريق عدده 66 بني آدم انا مسئول عنهم بشكل مباسشر و غير مباشر حسب طيبيعة عمل كل واحد منهم) اتمنى ان ارى جوزيه في برنامج يتكلم عن مبادئه و تصوره لطريق النجاح فهو من الممكن ان يكون أحد الملهمين لمن يريد أن ينجح و ما أحوجنا لهؤلاء.
أرفع القبعه للقدير مانويل جوزيه

خيال علمى...!!!ه

انا هاسرح بخيالى فى هذه التدوينة و اخرج شويه من الواقع اللى عايشينوا واتخيل الآتى:
بعد التعديل الاخير فى الحكومة تم استحداث وزارة مختصة بالزواج و الحياة الاجتماعية و الاسرية. ممكن يكون اسمها (وزارة الاسرة)ه

و طبعا انا معالى الوزير (مع التقدير للفنان احمد زكى)ه
اول ما هامسك الوزارة هاستحدث القوانين الاتية:
اولا فيما يخص البنات:
1- سن الزواج للبنات يبدأ من 25 سنة
2- الفتاة الجامعية لابد ان تعمل لمدة لاتقل عن سنة فى اى مجال (تخصص دراستها او غيره) والسبب هو اكتساب خبرة من الحياة و الانفتاح على المجتمع و تقدير دور الرجل فى العمل وما يلاقيه من صعوبات بعد الزواج.ه
3- لا يسمح باستخراج قسيمة زواج لاى بنت لم تحصل على الشهادة الابتدائية.حتى تكون قادرة على تفهم الحياة و تعليم الاولاد و تطوير نفسها و هذا هو الحد الادنى من المعرفة العامة.
4- كل فتاة تتزوج لابد وان يكون لها ذمة مالية مستقلة قبل الزواج ومبلغ لا يقل عن 10000 جنيه فى البنك باسمها وذلك لدعم رغبتها فى انهاء حياتها الزوجية اذا ارادت والحصول على سكن مناسب بعد الانفصال حتى لا تظل اسيرة الزواج الذى لا ترغب فيه بسبب عدم القدرة على توفير نفقات المعيشة بعد ذلك.
5- الحصول على شهادات معتمده من معاهد التدريب و التنمية البشرية التابعة للدولة فى فن ادارة الحياة الزوجية و تربية الاولاد و فهم طبيعة الرجل....الخ من الدورات التى سوف تعدها الدولة بمعرفة المختصين.
6- حضور دورات تدريبية اجبارية نصف سنوية بعد الزواج فى موضوعات تهم الاسرة و الطفل و الزوج
7- اقامة الزوجة شهر سنويا اجبارى خارج البيت و يكون معها الاولاد فى بيت اهلها او فى شقق فندقية تجهزها الدولة حتى يقدر الزوج قيمة زوجته و كذلك هى و تستمر العاطفة ويسمح خلال هذه الفترة باجراء اتصالات بينهما
8- عمل مستشفى عام للطب النفسى للسيدات المتزوجات بأجر رمزى يمكن المرأة من الذهاب للطبيب النفسى اذا احتاجت الى ذلك ولا يجوز للزوج منعها من ذلك
9- تجريم ضرب الزوجة ووضع قوانين و عقوبات صارمة لذلك تصل الى عقوبة السجن
10 - اطلاق قناة حكومية يديرها القطاع الخاص تتناول كل ما يهم المراة من خلال واقع المجتمع
11- جوائز نصف سنوية للزوجة التى تجعل بيتها جنة ويكون عدد الفائزات غير محدود و الجوائز قيمه تحصل عليها الزوجة فقط و يوضع شروط و قوانين لذلك

للحديث بقية ان شاء الله

اكبر مشروع فى الدنيا

اكبر مشروع فى الحياة هو الجواز

بس بشوف ان الناس مش بتخطط ليه كويس و مش بتدرسه كويس

الشاب او الفتاه بياخدوا القرار علشان احتياجات موجوده فعلا زى: العاطفه - الاستقلال عن الاسرة - الهروب من جحيم البيت ومن فيه اذا كانت المعاملة سيئة - الوازع الدينى - الحاح من الاهل - تقليد فى المجتمع حيث عند بلوغ سن معين يجب اتخاذ هذا القرار.......الخ

ولكن المشكلة تكمن فيما بعد ذلك

كان جحا بيلعن اللى اتجوز قبله واللى اتجوز بعده, فقالوا له ياجحا لماذا قال: اللى قبلى علشان لم ينصحونى واللى بعدى علشان لم يتعظوا بى.انتهى كلام جحا

اكتر مشروع تكرر فى الوجود هو مشروع الزواج و بالتالى كان نتايجه معلنه و موجوده فى كل بيت يعنى اكيد حوالين كل واحد

ناس اتجوزوا اقارب او اصحاب وشاف التبعه والمسئولية خاصة فى مجتمع كله كد و تعب زى مجتمعنا المصرى لكن عند اتخاذ القرار لا يؤخذ ذلك بعين الاعتبار و تتحكم العاطفة و ثقافة البيئة فى اتخاذه.

و بعدين تنشأ ما اسميه بالقنبلة الموقوته وهى الاسره التعيسة المكونة من زوجة بائسة وزوج مربوط فى ساقية واولاد لا يأخذون الحقوق التى تقيم حياتهم و تصنع منهم مستقبل مشرق.

طيب فيها ايه لما الناس تاخر الزواج لحد ما تكون مستعده لذلك والاستعداد ده له جوانب كتيرة هاتكلم عنها فى التدوينة اللى جايه.

ربنا يلطف

للحديث بقية ان شاء الله

ليس بعد

.كده يبقى اتنين و تلاتين سنة بالتمام و الكمال

.منهم نصهم تعب و شقى بلعب الدور بدون توقف, كتير اتمنيت اعتزل و قليل لما كنت لاقى نفسى
.دايما حاسس ان الدور مش بتاعى
.كانت احلى حاجة انى اسمع تحية الجمهور لكن دلوقتى لأ
.انا فاكر يوم ما وقعت من على الخشبة و كل حاجة فيا اتكسرت
.كلهم مشيوا وما فضلش حواليا الا اتنين رجالة و اتنين ستات و عقل و قلب
.وادينى اهو مشمر كم القميص و مكمل الدور
.دلوقتى نفسى فى حاجه واحده
.الستارة تنزل واخد اجرى واستريح
.بس هو العرض خلص؟
...........ليس بعد

انا راجع تانى

انا راجع تانى ان شاء الله علشان عندى كلام كتير عايز اقوله

طظ طظ طظ......!!!!؟

أنا مضطر أقطع الموضوع المكلكع اللي كنت بكتب فيه و أكتب عن حاجه تانية
الموضوع انه اخويا محمد البنا, اللورد ( مش عارف ليه أنا مسميه كده يمكن علشان انا حاسس انه ينفع لورد أو يمكن علشان بيفكرنى بمحمود الخطيب). المهم ما علينا.
الاسبوع اللي فات قرر محمد انه يوقف الكتابة في المدونة بتاعته علشان فى ناس بتهاجمه و بيخسر ناس من أصحابه إلى أخره زى ما هو كاتب في جواب الاستقالة المنشور على مدونته, و طبعا انا كتبت كلمتين في هذا الحدث بصراحة كانوا من قلبي, والناس طبعا كتبت .....الخ.
الموضوع بقى إيه انا مبسوط انه عمل كده!!!!!
ليه بقى يا فالح هو أنت فرحان في أخوك؟؟؟؟؟
ده حتى المدونة بتاعته مش منافسة للمدونة بتاعتك واصلا ما حدش بيجيلك في المدونة بتاعتك إلا ناس تتعد على أصابع اليدين بس تكون لواحد مبتورة احد ذراعيه. (طبعا ان معتز بيهم جدا و ربنا يبعد عنهم العين لحسن من غيرهم ابقى قاعد زى ال......).
لا طبعا ابسولتلى أنا فرحان علشان حاجات تانيه :
اولا : الواد محمد عندي أهم من المدونة و اللي فيها و حتى من الشبكة العنكبوتيه كلها (حلو المصطلح ده) ولما يكون في حاجة تعباه و يتخلص منها حتى و لو مؤقتا ده بالنسبة لي يبسطنى.
الحاجة التانية إن في نظرية في الحياة أنا شخصيا مش عارف أطبقها حتى الان و هي نظرية (طظ) ايوه طظ طظ طظ . يعنى إيه؟؟؟ يعنى طظ فى كل الحاجات اللي تأثر على حياتك بالسلب أو تتعبك أو تخليك مش عارف تعيش. إيه يعنى اتخلص منها طالما إنها مش في الدين أو حاجة مع ربنا ( طبعا باستثناء الزوجات. بهزر طبعا ) و اللي عمله محمد انه طبق النظرية دى حتى و لو مؤقتا و حتى لو لم يعلن ذلك و كمان حتى لو هو مش عارف النظرية دى أصلا او مش مقتنع بيها.
هييييييييه عقبالى لما أقول طظ لحاجات كتير مكلكعه حياتي.
بس خلاص
سلام