مافيا....... مافيا....... مافيا........ مافيا

دى ابسط كلمه اقدر اعبر بيها عن تجربتى اليوم فى ادارة المرور اثناء استخراجى رخصة القياده الخاصه.
من الخارج يعنى فى الشارع مجموعه من السيدات على فتيات بياخدوا منك فلوس علشان تركن ( الركنه دى حضرتك فى الشارع العمومى بتاع الحكومه) و مقسمين الشارع كل واحده ليها منتيئه حاجه زى الحدود بتاعت الدول كده هنا تبقى تبع هدى و بعد امتار تكون فى مملكة ام سيدو طبعا هما مظبطين مع الحى زى ما عرفت من واحده منهم.
طابع الدمغه ابو 20 قرش بيتباع ب 3 جنيه و طبعا مش متاح جوه فى المرور علشان تجيبه من بره و لما بقول للست اللى فارشه على الرصيف بهدوء ده ب 20 قرش خدى حتى جنيه حاولت ان تقنعنى انه مكتوب عليه 3 جنيه و لما اكتشفت انى بعرف افك الخط شدته من ايدى و قالت لى مش ناقصين خنقه على الصبح يا بيه و طبعا اشتريت لانه لا يوجد بديل و الست برده راضيتنى بكلمتين فى الاخر. كتر خيرها
تصوير الورقه بالداخل 3 اضعاف السعر بره .
على الشباك الرسوم 46 جنيه بياخدوا منك 49 جنيه مش عارف ليه
بتجيب 3 نسخ من كل ورقه بيستخدموا نسخه واحده ليك و الباقى مش عارف
النقيب اللى بياخد الورق النهائى بيزعق لينا كلنا
المهندس اللى بيختبر سابنى عمال اطلع قدام و ارجع وره وراح حته تانيه علشان الراجل اللى معايا يديله 20 جنيه و طبعا خدها و فورا بعدها ظهر و قالى اتفضل يا بيه انزل و مضى الورق من غير ما يشوفنى
فى الاخر الكمبيوتر طلع عطلان و ادونا ورقه تصريح يعنى على ما الكمبيوتر يتصلح و نروح تانى علشان نتصور و ناخد الرخصه و طبعا لما تتكلم يقولك نعمل ايه ما الكمبيوتر ابن ........ عطلان و كأنه كائن من كوكب تانى غضب و ما حادش عارف يراضيه و هو طبعا اللى معطل مصالح الخلق
بالمناسبه نسيت اقول انا كان معايا واسطه جامده و انا رايح لان فى ناس تانيه بتطلعها فى 3 شهور
طيب هى المشكله فى الناس اللى راضيه بكده و للا فى النظام و القائمين عليه.
احنا بنتعامل بشكل مش ادمى و المسئولين تحس انهم بيتصدقوا عليك مع اننا بنعمل اى حاجه يقولوها و بندفع فلوس .
اظن ان الناس حتى لو عرفت حقوقها و طالبت بيها فى مافيا لن تسمح بذلك لانها عايشه على كده و الفساد ده مصدر الدخل الاساسى لهم.
اليوم ده سبب لى خنقه جامده جدا وحاسس انه ما فيش فايده

مولد ستنا الشجره

فى مصر و على طريق مصر الاسماعيليه الصحراوى وجد المصريون المعجزه او الموهبه من عند ربنا كما قال احد المصريين و بدأت الثقافه تلعب دورها و هذا جزء مما نشر فى الجرائد
طلب المسؤولون بقسمي السلام والنزهة من قيادات محافظة القاهرة، الموافقة علي إزالة شجرة الكافور التي اكتشفت علي طريق الإسماعيلية بموقف العاشر نهاية جسر السويس يوم الخميس الماضي، والمحفور علي جذعها لفظ الجلالة «الله» يعلوه اسم «محمد»، وذلك بعد أن تجمعت أعداد كبيرة من المواطنين حولها يوميا للتبرك بها وتقبيلها والتقاط الصور بجوارها.
قال مصدر مسؤول بقسم السلام: إن تجمهر المواطنين أدي إلي عرقلة حركة المرور بطريق الإسماعيلية فضلا عن أن لديهم شكوكاً حول طريقة كتابة لفظ «الجلالة» وبأنه ليس طبيعيا، بل قام بحفره أحد المواطنين قبل سنوات، وأضاف أنه تم التنسيق مع قسم النزهة الذي يتبع له الرصيف الموجودة به الشجرة لتأمين المكان، ومنع المواطنين من التجمع حول الشجرة خوفا من تحوله إلي مزار ديني.

مش عارف امتى هانفوق و مش عارف هو الشعب ده غلبان و لا عبيط و لا يمكن معمول له عمل سفلى على فخد نمله عارجه.

وجه الشبه بين هاله سرحان و قناة الناس

تواجه د/هاله سرحان الآن تهمة الخداع للفتيات اللاتى قمن بالمشاركه معها فى برنامجها هاله شو تحديدا فى حلقات فتيات الليل و كذلك تهمة الاخلال بميثاق الشرف للاعلام وذلك بخداع المشاهدين حيث انها اتت بفتيات يمثلن دور بنات الليل و قامت بتحفيظهن الكلام الوارد فى الحلقه و اذاعت للمشاهدين انهن فتيات ليل بجد.
و انا لست ادافع عنها كما اننى ضد غلق هذه الملفات الشائكه و السكوت عنها , ولكن المهم هو طريقة التناول و ان يكون هذا التناول ايجابيا و يعرض المشكله و اسبابها و الحلول مع المتخصصين و المهتمين.
أما قناة الناس فهى فى وجهة نظرى لا تقل فى التهمه عن د / هاله سرحان و لمعرفة ذلك يكفيك مشاهدة برنامج واحد على القناه لتجد اعلانات التيم شوب تزف اليك بشرى القضاء على مرض السكر نهائيا وفى ايام قليله و ذلك من خلال عبوه بلاستيك فيها دواء اسمه شوجر هذه العلبه و التى تشبه علبة الكريم اللى كنا بنشتريها من الحلاق زمان بعد الحلاقه , ثم تكون البشرى الثانيه و الآجمد و هى علاج العقم و تحقيق فرصة الانجاب من خلال علبتين واحدة لونها اصفر و التانيه لونها ازرق (يا نهار ازرق) واحده للرجاله و التانيه للستات.
و ياتى المعلن بمجموعه من الممثلين . اللى بيمثل انه مغمى عليه واللى بتمثل انها منهاره و مش لاقيه حل و اللى بيمثل انه دكتور كبير و طبعا امامه اللاب توب بتاعه ..الى اخره.
و طبعا هذه الادويه المبتكره تخاطب امراض حساسه جدا و تخاطب عواطف الناس و مشاعرهم و بنظره تسويقيه تخاطب فئة متوسطى و محدودى الدخل و الغير مثقفين اللى الواحد منهم بيتعلق ب (قشه) بفتح كل الحروف.
و لم نجد مع اى علاج من المعروض شهاده تثبت موافقة وزارة الصحه او ترخيص الدواء للتداول او اسم الشركه المنتجه.
فى النهايه من المؤكد ان هذا لايخفى على قناة الناس و اذا كان يخفى فالمصيبه اكبر , ولابد ان يكون للقناه حق القبول و الرفض لآى ماده او اعلان يعلن عليها و هنا يكون وجه الشبه بين هاله سرحان و قناة الناس او العكس و ان كنت ارى ان الخطوره من قناة الناس فى هذا الموضوع اكبر.
و فى النهايه اذكر بأمرين
الآول : ال (سلوجن) بتاع قناة الناس شاشة تأخذك للجنه
الثانى : الفنان عادل امام كان له السبق فى هذا المجال لما اخترع الفانكوش

متى قالها....؟؟؟؟؟؟؟

عندما كان النبى (ص) مع سيدنا ابو بكر الصديق فى الغار و قد هم القوم ان يدركوهم و قال سيدنا ابو بكر الصديق للنبى (ص) لو نظر احدهم تحت قدمه لرأنا فقال له النبى (ص) المقوله المشهوره
"يا ابو بكر ما ظنك باثنين الله ثالثهما , لا تحزن ان الله معنا"
لكن متى قالها النبى (ص) ؟؟؟
بعدما اخذ بكل الاسباب التى تؤدى الى النجاح
ذهب الى ابى بكر فى و قت لم يكن يعتاد ان يذهب اليه فيه *-
طلب منه ان يجهز راحلتين بهما قوه *-
خرج للهجره في وقت لم يكن يخرج فيه الناس. *-
استأجر خبير فى الطرق ليقوده فى رحلته *-
سلك طريقا عكسيا فى المسير الى المدينه *-
كان لا بد ان يعرف فيما يفكر القوم فى مكه فعين من يأتيه بالاخبار و يمسح اثر المسير بغنمه فى نفس الوقت. *-
عين مسئوله عن الامداد بالطعام و الشراب اثناء الرحله. *-
بعد هذا كله قال النبى لابى بكر بقلب و اثق لا تحزن ان الله معنا
نحن جحدنا بقانون الاسباب و ركنا الى احلام و امجاد قديمه و الادهى اننا اصبحنا نجد فى فعل غيرنا ما يكفى لان نشعر بأن النصر و التقدم سوف يأتى و يعم الكل و نحن معهم طبعا و تبدلت آليات العمل الى الدعاء المنظوم المرتب و انتظرنا المهدى المنتظر الذى سوف يحررنا مما نحن فيه و اصبحت برامج تفسير الاحلام تحوذ على نسب المشاهده و الاهتمام و هربنا من مشاكلنا و عجزنا عن حلها و دفنا رؤوسنا فى الرمال.
ان الله ينصرمن ينصره
ان الله لا يغير ما بقوم حتى يغيروا ما بأنفسهم

ثقافة التناكح للتكاثر

دعيت امس الى حضور حفل زواج احدى بنات صديق عزيز لدى و كان العقد فى احد المساجد و كان البرنامج متنوع بين الكلمات و الاناشيد الاسلاميه وفى نهاية البرنامح اعلن مقدم الحفل عن بشرى للحاضرين و هى تواجد الدكتور عبد الحى الفرماوى فى المسجد و انه سوف يختم به فقرات الحفل .
للحقيقه كان خبرا جيدا بالنسبة لى فهذا الرجل له مكانته و علمه و كنت احضر له خطب الجمعه منذ زمن . .
لكن سرعان ما تحول ذلك عندى الى العكس بعد ما سمعت الكلمه.
تكلم الدكتور فى مسألة الزواج و دعا الناس الى التناكح و التكاثر وفقا لحديث النبى (ص) (تناكحوا تناسلوا تكاثروا فإنى مباه بكم الامم يوم القيامه) الحديث . او كما قال (ص)
و بدء فى ترسيخ نظرية المؤامره و ان الغرب يريد ان لا يزيد عدد المسلمين و ان يوقف نسلهم و قال انه قرأ تقرير يوصى فيه اعداء الاسلام بمحاربة المسلمين بثلاثة امور:
1- المجاعات 2- الامراض 3- الحروب
مع اعتراضى واعتقادى ان ترسيخ نظرية المؤامره فى اذهان الناس يضر اكثر مما يفيد.(الاعتراض لى انا)
ثم تتطرق الدكتور عبد الحى الفرماوى الى قضية العنوسه و ان العنوسه فى الاسلام تبدأ بعد ان تحيض البنت يعنى سن 16 -17 سنه و فى اقل من كده .
ثم تتطرق الى انه ينبغى على القادرين من المسلمين ان يساعدوا الشباب الذى لا يستطيع الزواج يعنى كل خمسه يشتركوا و يجيبوا له حاجه فى الشقه و هكذا ممكن من التبرعات او زكاة المال يقدر الشاب يكون بيت و يتجوز و طبعا النصيحه بانه يخلف كتير علشان نتكاثر.(انتهى ملخص كلام الدكتور عبد الحى الفرماوى).
طيب يا دكتور بعد ما الناس تلم و تجوز الولد و البنت اللى عندها 16 - 17 سنه خلينى اقولك ايه اللى بيحصل بعد كده.
اولا
بيخلفوا كتير علشان نتكاثر و بعدين الشاب مش بيقدر يصرف على البيت لانه فى الاصل ما كانش قادر يكونه فتبدأ المشاكل الماديه و الخناقات و تتحول الحياه الى جحيم و علشان يحل المشكله بيشتغل اكتر من شغلانه و يبقى عدد اللى مربوطين فى الساقيه زاد واحد و طبعا ده لا تنتظر منه اى شيء غير شغله
ثانيا
البنت اللى عندها 17 سنه و اللى لسه ما تعرفش حاجه عن الحياه الزوجيه و لا تربية العيال و خلافه تصدم بالواقع و تبدأ تجرب و غالبا ظروف الحياه بتكون اقوى منها فالدنيا بتعك معاها فى الآخر
ثالثا
العيال مش بتاخد نصيبها من التعليم ولا التربيه ولا الرعايه الصحيه و بالتأكيد و لا الترفيه.
يعنى بيبقى عندنا قنبله موقوته يا إما بتنفجر بالطلاق او تفضل فى حالة نشاط وده نفس الخطر برده , ناهيك عن الانحراف و تعويض النقص و نسيان الهموم بالطرق الغير مشروعه.

فى النهايه يا دكتور اظن ان عدد المسلمين مش قليل لكن كفأتهم و تأثيرهم هو اللى معدوم و احنا مش محتاجين نتكاثر لمجرد التكاثر فالحكمه فى الموضوع إن النبى(ص) يتباهى بينا . و لا اظن ان النبى(ص) يتباهى بأشباه الناس اللى هايكونوا بيعيشوا كده و بيفكروا كده.

??????......هو العفريت بيضحك ليه

ليه اول العفريت لما بيطلع من المصباح السحرى دايما يضحك سواء كان مع اسماعيل يس او حتى مع زكى رستم.
يا ترى هو بيضحك ليه :
يمكن علشان انت لما دعكت المصباح و طلع العفريت جبتله براءه بجد يعنى طلعته للنور من الأم أم الى كان محبوس فيه , و اليومين دول انت عارف ان موضوع البراءه ده بجد موضوع صعب جدا . اللى بياخد براءه من الأم أم اليومين دول بيطلع عليه تانى .
يا قلبى ى تحزن.
و لا يمكن علشان انت صعبان على العفريت و انت فاكر انه هايحقق لك كل احلامك,
عايز عربيه , و شقه تمليك (حتى لو تلت مطارح بمنافعهم فى صقر قريش زى اللى هايجبها محمد هنيدى لحبيبته لى فى فيلم فول الصين العظيم) , وعايز حساب فى البنك علشان تعرف تعلم العيال كويس , وعايز شغلانه فى شركه كويسه و مستقره , وعايز تحج انت و عيالك و مراتك بس السفر يكون فى طياره مش عباره , وعايز تشترك فى نادى محترم علشان تلعب رياضه و تعلم العيال السباحه و ركوب الخيل بدل الخيل الجربانه اللى بيركبوها لما بنوديهم الهرم .
و طبعا العفريت هارش الموضوع و عارف ان حضرتك محتاج كتيبة عفاريت تحقق لك طلباتك.

و جايز يكون العفريت مثقف و متابع الحوارات و العوء اللى احنا فيه و هو جوه الأم أم , و عارف ان احنا بال صلى على النبى رجاله ووقفنا و قفت رجاله و اهم صفات الرجاله ان الواحد يكون لا موءاخذه أستك يعنى يتشد ماشى و شغال و عايش , يتساب يرجع تانى و برده ماشى و شغال و عايش و بتلتميت جنيه فى الشهر نعيش و نأضيها و لا نتكلم .
راح العفريت قال لنفسه أول ما اخرج من الأوم أوم استعرض عضلاتى مع شوية دخان و ضحكتين مرعبين هايكش الزبون من الجو ده و طلباته تبقى فى المعقول ده اذا استحمل الليله و عاش.

و قد يكون العفريت فرحان بنفسه و فاكر انه رايح عند شوية إنس غلابه و هايراضيهم بكام طلب و هو قاعد بيضرب فنجان نسكافيه , فتقوم حضرتك تطلب منه : عربيه مرسيدس بى ام دبليو صناعه المانى, امريكى, يابانى, بالاشتراك مع مصر .
يقوم العفريت متجنن و يفضل يضرب بقرونه فى الحيطه و يقولك اطلب حاجه تانيه.
فتقوله خلاص هاطلب حاجه تانيه : عايز مصر يكون فيها جهاز حر يراقب الحكومه فى اللى بتعمله فى الشعب و يحاسبها
يقوم العفريت يقولك عايز العربيه ملاكى القاهره و لا الجيزه.

يا ريت لو حد يعرف اسباب تانيه يقولهالى

للأمانه :الموضوع و اخد فكرته من جريدة الدستور بس و الله التحابيش من عندى و اهو كله سلف و دين.

فمبلغ العلم فيه انه بشر و انه خير خلق الله كلهم (صلى الله عليه و سلم)

*-اول ما نزل الوحى على النبى (ص) فى غار حراء و كان (ص) عنده 40 سنه و 6 اشهر فى رمضان و ذهب الى العظيمه امنا خديجه قال لها: زملونى زملونى. فزملوه .
فقال لخديجه:مالى و اخبرها الخبر, لقد خشيت على نفسى
(الرحيق المختوم)
هنا مكمن البشريه اى انسان طبيعى يتعرض لهذا الموقف لابد اى يخاف على نفسه.

*- بعد ذهاب الوحى و رجوع النبى(ص)للغاركانت الدلاله الثانيه يرويها النبى (ص) بنفسه.
قال رسول الله (ص) بعد ذكر مجيء الوحى : لم يكن من خلق الله أبغض على من شاعر أو مجنون كنت لا أطيق أن أنظر اليهما,قال:قلت ان الأبعد- يعنى نفسه- شاعر او مجنون, إلا تحدث بها عنى قريش ابداَ. لأعمدن الى حالق من الجبل فلأطرحن نفسى منها فلأقتلنها , فلأستريحن قال : فخرجت أريد ذلك, حتى اذا كنت فى وسط الجبل سمعت صوتا من السماء يقول : يا محمد أنت رسول الله, وأنا جبريل قال فرفعت رأسى الى السماء, فإذا جبريل فى صورة رجل صاف قدميه فى افق السماء يقول : يا محمد أنت رسول الله وأنا جبريل. قال فوقفت أنظر اليه, و شغلنى ذلك عما اردت , فما اتقدم ولا اتأخر.
(ملخص من سيرة بن هشام )
كان محمد (ص) يختلجه المشاعر الطبيعيه التى توجد لدى اى انسان حر من اصل كريم لا يقبل على نفسه أى سوء. صلى الله عليه و سلم
*- و ازداد عقبة ابن ابى معيط فى شقاوته و خبثه, فقد روى البخارى عن عبد الله بن مسعود رضى الله عنه : أن النبى (ص) كان يصلى عند البيت و ابو جهل و اصحاب له جلوس , اذا قال بعضهم لبعض ايكم يأتى بسلا جزور بنى فلان فيضعه على ظهر محمد إذا سجد. فأنبعث أشقى القوم و هو (عقبة ابن ابى معيط ) جاء به فنظر,حتى اذا سجد النبى لله وضع على ظهره بين كتفيه , وأنا انظر , لا أغنى شيئا , لو كانت لى منعه , قال : فجعلوا يضحكون , و يحيل بعضهم على بعض (أى يتمايل بعضهم على بعض مرحا و بطرا) و رسول الله(ص) ساجد , لا يرفع رأسه حتى جأته فاطمه , فطرحته عن ظهره , فرفع رأسه , ثم قال :اللهم عليك بقريش ثلاث مرات . فشق ضلك عليهم اذ دعا عليهم و قال :و كانوا يرون ان الدعوه فى ذلك البلد مستجابه , ثم سمى : اللهم عليك بأبى جهل , و عليك بعتبه بن ربيعه , و شيبه بن ربيعه ,و الوليد بن عتبه ,و أميه ين خلف , و عقبة ابن ابى معيط – و عد السابع فلم يحفظه- فو الذى نفسى بيده لقد رأيت الذى عد رسول الله (ص) صرهى فى القليب . قليب بدر.
(الرحيق المختوم)
دعا النبى (ص) على من اذاه من الاشقياء الذين لا يرجى هدايتهم كل انسان له طاقة تحمل و النبى (ص) كان له اعظم هذه الطاقه و هذا لم يمنع انه بشر.
*- عندما ذهب عمر بن الخطاب الى دار الآرقم يريد الاسلام و أحذ يطرق الباب
والصحابه خائفون الا سيدنا حمزه و فال لهم النبى(ص) افتحوا له الباب فإن كان جاء يريد خيرا بذلناه له , وإن كان جاء يريد شرا قتلناه بسيفه.( انتهى حديث رسول الله(ص)).
انظر الى الموقف التالى :
فخرج النبى (ص) الى عمر حتى لقيه فى الحجره , فأخذ بمجامع ثوبه و حمائل سيفه , ثم جذبه جذبة شديده فقال :أما انت منتهيا يا عمر حتى ينزل الله بك الخزي و النكال ما نزل بالوليد بن المغيره ؟ اللهم : هذا عمر بن الخطاب , اللهم أعز الاسلام بعمر بن الخطاب , فقال عمر :أشهد الا لا اله الا الله و انك رسول الله .
(تاريخ عمر بن الخطاب لابن الجوزى)
و الله مشهد لو مخرج شاطر اخرجه ياخد جوايز.
احساس النبى ان الدعوه هاتضيع جعله فى منتهى القوه و الشده و احساسه بالامل و الرغبه فى الاستمرار جعله يدعوا لعمر فى نفس اللحظه .
صــــلــى الــلـــه عــــلــــى مـــحــــــد صـــلـــى الــلــه عـــليـــه و ســـلـــم
صــــلــى الــلـــه عــــلــــى مــــحـــمـــد صـــلـــى الــلــه عـــليـــه و ســـلـــم
صــــلــى الــلـــه عــــلــــى مـــحــــمـــد صـــلـــى الــلــه عـــليـــه و ســـلـــم

وللحديث بقيه

خبر جامد جداااا

محلات كشرى ابو طارق فى مصر بتدرس دلوقتى عمل كشرى دايت .الخبر عرض فى تقرير مصور فى برنامح العاشره مساء يوم الثلاثاء 6/2/2007

....... والأجمد فى نفس التقرير ايضا

محلات لاكلوك بتاعت المخلل عملت مخلل دايت بيتنقع في الميه 48 ساعه بدون ملح قبل البيع للجمهور

يا عينى على المزيج التسويقى

و سلم لى على مديرين التسويق و تطوير الاعمال

لمعرفة مزيد من المعلومات يرجي زيارة
http://www.aboutarek.com/

كلنا بنمثل فى الدنيا.... شويه على نفسنا و شويه على بعض
لما الواحد بيسئل نفسه كام حاجه بيعملها و هو مقتنع ....وهو بيعملها بمزاجه.....و هو مش عامل حساب لحد
بيلاقى الناتج حاجات معدوده...ده اذا كان فيه اصلا
الظاهر عمنا يوسف وهبى كان عنده حق