انا عايز أقول في الأول ان مصر دي موززة آخر 25 حاجة
الله الله عالمستقبل باين في عيون كل ولادنا............... بجهودنا يا ناس هايكون اكتر و الخير هايعم على بلادنا
تحيا مصر تحيا مصر تحيا مصر
الشعب كله بيناقش الدستور و يبدي رأيه و المثقفين شغالين الله ينور على الفضائيات و الجرائد و الانترنت بيطرحوا وجهة نظرهم
ايه الحلاوة دي ايه الطعامة دي ايه البلد الجامدة موت دي بحبك بحبك بحبك يا مصر
بخصوص التعديلات
في ناس خايفة و عندها قلق عظيم و الحقيقة هذا القلقل له مبرراته
انا طبعا هاصوت بنعم لييييييييييييه؟؟؟؟؟؟؟
اولا لو الناس خايفة من انه يجي رئيس بصلاحيات كتيرة خلال الفترة الإنتقالية و يخرب الدنيا و يؤثر على المجلس و اللجنة التأسيسية اللى هاتعمل الدستور طيب ماهو نفس التخوف مع مجلس رئاسي يعني ايه الله يضمن لينا ؟؟؟؟؟؟؟؟! يبقي رئيس منتخب أحسن من مجلس رئاسي معين. و بعدين مين اللى هايعنه ما هو الجيش برده و كمان هيكون في واحد من الجيش في هذا المجلس يعني هاتكون القوة معاه و هايفرض رأيه يعني من الآخر بندور في حلقة مفرغة
ثانيا احنا عايزين الجيش يفضل قاعد ولا يمشي يروح يشوف شغله لازم الجيش يرجع لدوره و الدولة تقوم بدورها
ثالثا انا مطمن جدا في ظل وجود حكومة د/ عصام شرف و شايف انها هاتعبر المرحلة بنجاح و مش هاتقبل اي مساومات من الرئيس المنتخب لو حب يعني يلعب بديله شوية
رابعا ثقتي في الشعب العظيم و مولانا ميدان التحرير كبيرة جدا انهم يوقفوا امام اي واحد عايز يهيس حتي لو كان الرئيس المنتخب
خامسا الناس اللي خايفة من الإخوان و فلول الحزب الوطني بقولهم الإخوان هاينزلوا على 30% فقط من المقاعد و فلول الحزب انا اشك انها تحقق نجاح بدون تزوير و الشعب دلوقتي واعي و صاحي و مفنجل عينيه على الآخر
سادسا المجلس العسكري قرر انه هايفتح حرية تكوين الأحزاب بعد الإستفتاء يبقى رجالة الثورة يشدوا حيلهم و يشتغلوا من دلوقتي على برامج الأحزاب اللى هايكونوها و ينزلوا للناس و الناس جاهزة جدا لإستقبالهم و التفاعل معاهم لان الثورة اختزلت الزمان و المكان وده لازم يستغلوه بسرعة قبل الناس ما تهدي و تنسى
نعم للتعديلات الدستورية
بحبك يا مصر بحبك يا مصر بحبك يا مصر
2 comments:
اشاركك الحب يا استاذ على وان شاء الله هاشركك الموافقه, بس نفسى فى حاجه ...نفسى يتحل الحزب الوطنى كله ونجيب عاليه واطيه ونفضها سيره وان اعضاء الحزب الغير شرفاء وما اكثرهم يتمنعوا من اى مشاركه سياسيه او حزبيه, مش عاوزين زيول الفساد...وكمان نفسى الناس تبطل انانيه ويكون عندها صبر...صبر اكيد هيكون اقل من 30 سنه الى صبروها الناس طول حكم الفساد.......يا رب نكون احسن ناس
تحيا مصر بأبنائها وشعبها وأهلها :)
Post a Comment